Живееме во време на мноштво предизвици од различна природа.  Живееме во несовршен век, несовршен свет и во несовршено општество, а сите несовршени нешта имаат свои импликации и врз другите. Знам дека изразот „утопија“, првпат споменат од познатиот Томас Мор, претставува своевиден „демант“ за постоењето на совршено општество.  Но, ако се околу нас е толку несовршено, ако мноштвото од човековата популација смета дека совршенство не постои, се поставува прашањето дали треба да се помириме со тоа? Јас велам „не“.  Подобро е нешто да сториме, макар тоа било и несовршено, отколку да кренеме раце, откажувајќи се од стремежот кон совршенството. Потрагата по него не треба да не води низ долги и исцрпувачки патишта. Не, тоа е толку блиску. Тоа совршенство, или барем тој чекор, два или три до него, се наоѓа во нас, во нашите срца и души, но само доколку  во нив владее  хармонија меѓу човекот и човечноста. Имајќи ги во предвид таквите мои размислувања,  во кои не сум осамен, останувам на браникот на мојот идеал наречен „едно општество за сите“, идеал кој стана и главен дел од името на фондацијата со која гордо раководам. За среќа, таа гордост не е само моја, туку и на членовите на Фондацијата – прекрасни луѓе со светли хоризонти во нивното восприемање на светот и животот.

Ме крепи вербата во „ЗАЕВ – Едно општество за сите“, во мисијата, визијата и оправданоста на нашето постоење, и како Фондација, и како луѓе, но и вербата во оние кои беа наши партнери во реализацијата на бројните активности, сите оние со кои споделуваме исти погледи и вредности.

До нашиот замислен „апогеј“ не се стигнува со совладување на неколку скалила одеднаш, ами со качување скалило по скалило. Втората измината година од постоењето на фондацијата ја доживувам само како второ искачено скалило од нагорната линија по која сме наумиле да се движиме, кон тој наш „апогеј“, кон таа наша заедничка цел.

Поддршка за проектот „Од чекор до електрична енергија“ – СОУ „Мирко Милевски“ – Кичево

Испратена хуманитарна помош за настраданите во земјотресот во Турција

Стипендирање на пет специјализанти за усовршување во институтот IRCAD во Стразбур, Франција

Дониран хируршки микроскоп на Универзитетската клиника за пластична и реконструктивна хирургија – Скопје

Финансиска поддршка за патување во САД на победниците на „NASA SPACE APPS CHALLENGE“ – 2023

Донација на спортски реквизити за ООУ „Даме Груев“ – Куклиш

„Немаме право да уживаме во среќата ако не ја делиме со другите“ – рекол познатиот нобеловец Џорџ Бернард Шо. Чинам дека оваа мудрост има неограничен рок на траење, иако датира од некои други времиња, иако времево во кое живееме се повеќе се одликува со нагласен егоизам.

Сепак, и покрај се,  уверен сум дека пројавата на бегство од позитивните човекови  особености е „трка на кратки патеки“.

Еднаш веќе бев рекол, и чувствувам потреба повторно да кажам: „Добрината и човечноста не треба да ни бидат непознати именки или само „наши потстанари“ кои доаѓаат и си заминуваат. Тие треба постојано да бидат дел од нас. Тоа не се учи. Тоа е производ на нашите емоции. А човекот е човек кога знае да ги слуша тие емоции без да ги заклучува во себе.  Човекот е човек кога е кадарен да го отвори срцето за сите луѓе, како убав дар кој предизвикува уште поубави чувства“. Тие чувства наречени „среќа“ подеднакво им припаѓаат  и на  „даруваниот“ и на „дарувачот“.

Поддршка на тимот од СОУУД „Димитар Влахов“ од Струмица за учество на Меѓународниот гастрономски фестивал „Бисер мора“ во Супетар на Брач, Хрватска

Хуманитарна помош од прехранбени производи за социјално загрозени семејства од Липково

Поддршка на Био клубот при СУГС Гимназија „Раде Јовчевски – Корчагин“ од Скопје за збогатување на „Корчагински хербариум“

Обезбедени парични награди за авторите на најдобрите есеи од Конкурсот на Институтот за македонски јазик „Крсте Мисирков“, по повод 5 Мај – Ден на македонскиот јазик

Финансиска поддршка за серијата „Три дена во Лерин и Мала Преспа“ во продукција на порталот „Рацин. мк“

Поддршка на акцијата „Садиме здравје“, во соработка со Министерството за здравство

Нашата перцепција за општеството не смееме да ја поистоветиме со гледање театар, во кој поделбата на  ликови се сведува на главни, споредни и статисти, ниту како нешто што започнало со кревање на завесата на почетокот  и нејзино спуштање за означување крај, а во која сите ние сме само публика. Таквиот однос кон нештата кои не опкружуваат е манифестирање на рамнодушност. Таквата рамнодушност е една од акутните болки на новото време, која не смееме да дозволиме да стане и хронична.  Луѓето се повеќе „забораваат“ да им се радуваат на радостите на другите и да тагуваат со тагата на другите. Да биде сликата на светот уште полоша, луѓето се радуваат на туѓата тага и тагуваат по туѓата среќа. Во една ваква сива констелација на односите меѓу луѓето, убаво е да се пронајде вистинскиот пат до она место на „нашата слика“ во кое се уште опстојуваат исклучоци, верни на вистинските човекови вредности и морални принципи, подготвени низ сопствените примери да бидат вистински лек за споменатата болка. Нашата фондација, меѓу другото, го негува својот стремеж да биде „будилник“ на човекот во човека.

Продуциран You tube – видео серијалот „Успешни приказни“ за млади успешни луѓе од нашето секојдневие.

Поддршка за првиот македонски аналоген астронаут во НАСА, Мартина Димоска

Спонзорство за јубилејниот 30 фестивал на фолк и поп композиции „Охрид фест“ 2023

Стипендии за 68 талентирани ученици од струмичките основни и средни училишта, во соработка со Општина Струмица

Поддршка за стипендирање студенти од програмата на втор циклус студии за младинска работа на Филозофскиот факултет при универзитетот „Свети Кирил и Методиј“ – Скопје

Донација за учениците од Основното училиште со ресурсен центар (Посебно основно училиште)  „Св Климент Охридски“  од Ново Село

Границите како административни линии ги исцртале  луѓето за да се разделат едни од други по разни основи. Некои од тие граници се одамна исцртани, а некои се уште се прецртуваат, исцртуваат и доцртуваат.  За жал, живееме во време во кое, постојат луѓе кои се повеќе создаваат индивидуални невидливи граници околу себеси. Но, за среќа, се уште постојат добрината, емпатијата, хуманоста и љубовта кои на најдобар можен начин ги бришат границите и ги совладуваат сите можни бариери. Сите тие нешта ни даваат до знаење дека треба да зборуваме со универзалниот јазик на човечноста, кој ќе ни овозможи да споделуваме среќа со оние со кои го делиме заедничкиот именител – човек. Не оној човек од латинската изрека „Homo homini lupus est“ (Човек на човека му е волк), туку оној кој е кадарен да даде свој придонес за разубавување на светот,  со одлучен стремеж, еден убав ден, таа изрека да исчезне од списокот на мудростите.

Спонзорство за Интернационалниот театарски фестивал „Свети Јоаким Осоговски 2023“ во Крива Паланка

Донација за „СОС Детско село“

Донација на дел од опрема за потребите на ЈЗУ Универзитетска клиника за дигестивна хирургија

Главно спонзорство на Јуниорската балканска олимпијада по информатика

Донација на шест мотоцикли за зајакнување на капацитетите на МВР

Поддршка за Центарот за дневен престој и индивидуален третман „Едупрактика“ , за набавка на сензорно-дидактички реквизит

Не сме сами во светов, ниту сме сами на веков. Како да го промениме светот во кој живееме, како да го направиме подобро општеството во кое битисуваме, ако ние самите не се промениме, ако ние не станеме подобри, поодговорни и порешителни во чекорењето низ животот. А тој живот е само еден и единствен, и треба мудро да биде искористен. Ако е така, тогаш секој празен чекор и секоја импровизација се само залудно потрошено време во намерата да оставиме свој препознатлив нишан врз нашето постоење и врз постоењето на општеството на кое му припаѓаме.

Самопочитта, а не самољубието,  е еден од предусловите да се има почит и кон други луѓе и да се манифестираат љубовта и добрината со сите нивни белези. Нашата фондација, со верност кон сопствените принципи, сфаќања и етички норми,  доследно ги негува рецепторите од своите сетила,  преку кои го креираше мозаикот од ангажмани во изминатата 2023 год. Во тој дух го продолжуваме одот кон зацртаната цел.

Спроведена акција со Министерството за труд и социјална политика за доделување 300 пакети со прехранбени прозводи за социјално ранливи семејства и уште 250 пакети во соработка со здружението „Амбрела“

Поддршка за посетата на Маврово на деца од домовите „11 Октомври“ и „25 Мај“ од Скопје

Поддршка на Хуманитарното здружение „Д-р Трајче Нешковски“ за предновогодишниот настан „Насмевка за секое дете“ во Гостивар